Nez Rouge er en Grischun

La societad novfundada ha cumenzà cun 156 voluntaris

DA FLURIN ANDRY / ANR

La societad grischuna vegn purtada da quatter partenaris. L’acziun Nez Rouge ha sias ragischs en il Canada: In professer a l’Universitad da Quebec aveva udì dals numerus accidents durant il temp da Festas. Perquai ha’l gì dal 1984 l’idea da porscher ad automobilistas ed automibilists stanchels u alcoholisads il servetsch da’ls manar a chasa cun lur agens vehichels. Il num da l’organisaziun deriva da la paraula dal pitschen ren che maina a chasa il San Niclà en sia schlitta. Il nas cotschen da l’animal glischa uschia ch’els chattan senza fadia la dretga via. Dapi il 1990 datti il servetsch dal Nez Rouge er en Svizra, l’emprim en il chantun Giura, uss existan 23 secziuns cun 8000 voluntaris. L’onn passà han quels manà a chasa 24 074 persunas. Dapi curt datti er ina secziun grischuna. Quella han fundà ils partenaris Kuoni AG, Calanda/Heineken, la Ring Garage ed il Radio Grischa. «Dad uss fin Bumaun 2013 purschain nus las fins d’emna e las sairas da Festa il servetsch da manar a chasa tgi che vul en las regiuns Cuira, Tusaun, Lai, Claustra, Flem, Glion e Bogn Ragaz», di Clau Caviezel, commember da la suprastanza, «fin uss s’han annunziads tar nus gia 156 voluntaris per far quests transports, ulteriurs èn bainvegnids.» Ins po s’annunziar per telefon 081 286 30 37. La centrala che coordinescha ils servetschs da transport sa chatta tar la Kuoni AG a Domat. Sco che Caviezel agiunscha è Nez Rouge ina campagna da prevenziun «senza la finamira da far gudogn». Il proxim onn prevesan ins tenor el da porscher il servetsch er en Engiadina.