La clinica dil di per attempai ei dumandada

Grazia alla clinica dil di a Glion san attempai cun malsognas dalla psica star pli ditg a casa

Da Susi Rothmund / ANR

A caschun dil di dallas portas aviartas dalla sonda vargada ein numerusas persunas s’informadas dalla nova purschida dil Survetsch psichiatric dil Grischun. Igl ei bi sch’ils attempai san star a casa aschi ditg sco mo pusseivel, savens ein ils parents denton surdumandai culla tgira e vegnan als agens cunfins. Els drovan in paus, mo vulan saver en buns mauns ils seniors. Ussa dat ei era en Surselva ina buna soluziun, senza stuer haver schliata cunscienzia san ils parents surschar ils attempai al team dalla gerontopsichiatria staziunara a Glion. Quella vegn menada da Ursula Giustiniani e dil miedi Florian Kopper e team. Dapi ils 5 d’october ei la clinica dil di alla Via Centrala 2 aviarta tschun dis ad jamna e quei dallas 08.30 tochen las 16.30. Tenor Ursula Giustiniani passenta la gronda part dallas persunas cun ina diagnosa psichiatrica in tochen dus dis ad jamna ella clinica dil di a Glion. Singuls vegnien denton era tschun ga ad jamna. La menadra dalla genrontopsichiatria staziunara a Glion sa ch’igl ei buca sempel da plazzar persunas cun ina diagnosa psichiatrica en ina instituziun: «Cun nies agid duein els saver viver aschi ditg sco pusseivel a casa», puntuescha ella.

Pli segirs da sesezs

Per realisar la clinica staziunara ei ina habitaziun ella secunda alzada vegnida renovada ed adattada. En stanzas beinendrizzadas, claras e spaziusas porscha la clinica dil di plaz per tschun pazients. «Tier nus vegnan ils pazients activai, integrai ella gruppa ed han era temps e spazi da ruassar», ha Ursula Giustiniani declarau. Quels dis seigien cheu per ch’ils pazients, mo era quels che tgiran els, possien serevegnir e tancar energia. «Nus luvrein individualmein e cullas resursas ch’ein avon maun, mussein ad els tgei ch’ei san aunc e dein peisa ch’ei hagien muments positivs.» Quei fetschi ils attemplai pli segirs da sesezs ed els vegnien era a frida meglier a casa. «Nossa finamira ei da mirar ch’ils pazients hagien experientschas da success, quei fa els pli ferms e lur toleranza da frustraziuns el mintgadi vegn pli gronda», ha il psichiater Florian Kopper aschuntau.

Ei vegn buca lungurus

Il program da trenament ed exercezis ella clinica dil di ei vasts e vegn adattaus individualmein als basegns dallas persunas attempadas. Per ellas ein ina structura dil di e la cuntinuitad da gronda impurtonza. «Quei dat ad els segirtad e dapli qualitad da viver», sa Ursula Giustiniani. La specialista da tgira Janine Schumann ha mussau tgei giugs ch’ella fa per trenar la memoria e las habilitads dils attempai. Da cumpignia mirien ei per exempel tgei proverbis che mintgin sappi aunc, in tili l’auter e di per di vegnien pli biars endamen. «In um saveva tuttenina recitar in tschuat proverbis, ils auters han ludau el e quei ha fatg bein ad el», ha la dunna raquintau. Ils tschun plazs ella clinica dil di per psichiatria d’attempai ein occupai bein, singuls plazs ein denton aunc libers.

Persuna da referiment

Biars s’annunzian sezs tier la gerontopsichiatria staziunara ni vegnan annunziai da parents. Savens vegnan ils attempai era assignai dils miedis da casa ni dallas casas da tgira, da spitals ni d’autras instanzas. Al discuors d’entrada vegn il pazient accumpignaus d’ina persuna da tgira ed eventualmein da parents. Il pazient sa prender investa dalla staziun e vegn presentaus als auters. Suenter l’entrada controllescha il miedi il pazient e risguarda era la historia dalla veta e facturs psicologics per in sclariment psichiatirc precis ed ei dat ina viseta medicinala exacta per saver entscheiver cul tractament necessari. Ella vegliadetgna ein simtoms psihics numnadamein savens caschunai ni susteni da facturs corporals. Tut tenor diagnosa vegn ina terapia che risguarda differents aspects instradada. Tier la terapia s’auda il tractament cun medicaments, la terapia da discuors, discuors ella gruppa e la structuraziun d’in ambient terapeutic. Tut tenor basegns, indicaziun e resursas offerescha la clinica secapescha era terapias d’activar ed occupaziuns da recreaziun sco ir a spass, cuschinar, far si iert ni far gimnastica fan cuort’uriala. En in ambient familiar segidan las persunas da referiment era d’exequir lavurs dil mintgadi. Mintga pazient survegn ina persuna da referiment che accumpogna el duront sia dimora ella clinica. Igl agid e susteniment dils parents ei giavischaus e beinvegnius. Tenor Ursula Giustiniani surprendan las cassas da malsauns ils cuosts per la dimora ella clinica dil di.