Il pli ault e bi «pigniel»

La «Panera» da Luven ei il pli grond pégn singul dalla Svizra

da martin Cabalzar

Sco quei ch'igl expert da plontas ed autur dil cudisch «Baumriesen der Schweiz» Michel Brunner ei s'exprimius enviers La Quotidiana ei la «Panera» da Luven cun sia perfetga fuorma conica cun roma che tonscha tochen plaun schizun «in dils pli bials pégns dall'Europa». Cun ses 47 meters altezia, sia circumferenza da 5,85 meters sin cuscha ed in diameter da 1,80 meters sill'altezia dil pèz ed ina emprema rasada da roma da 15 meters ha la plonta daveras ina imposanta statura ed ina cumparsa gigantica. Igl iniziant dil project «pro arbore» Michel Brunner che s'engascha per l'inventarisaziun digl uaul svizzer schazegia che la plonta da Luven hagi rodund 250 onns. Tenor in schazetg precaut furness la plonta rodund 40 meters cubic lenna. Sco quei che la presidenta communala Christine Sommer sincerescha ha la vischnaunca da Luven denton negin interess da pinar quella plonta unica che attrai adina pupei l'attenziun d'indigens e turists. La «Panera» sesanfla sut la baselgia en ina prada idillica che porta il num Bual. En sia vischinonza devan la buobanaglia ed ils giuvenots da Luven pli baul ballapei. Ils pli curaschus ughegiavan schizun da reiver da quella «scala celestiala» siadora entochen tier sia cruna per allura seschar lischnar en descensiun spectaculara dalla roma giuadoGia 1915 era la plonta extraordinara dada en egl al conventual dalla claustra da Mustér K. Hager. Gia lu era la plonta varga 30 meters e dapi lu ei ella carschida per varga la mesadad. E quei malgrad ch'ella ei persula ed ei buca stada sfurzada da crescher ad ault per mitschar dil spessom digl uaul. Damai che sia roma penda engiuviars ha ella era pudiu resister a grondas nevadas senza blessuras. Tenor Brunner ei la «Panera» da Luven ina «plonta da muntada naziunala» che sto era vegnir protegida adequatamein. Ulteriuras interessantas historias davart plontas impurtontas en Svizra sa ins leger en siu cudisch «Baumriesen der Schweiz».