×

«Gieri de Frundsberg», generus donatur

(anr/abc) En Surselva dat ei numerusas ruinas da castials medievals. Ina gronda part da quels ei accessibla e dat perdetga d’ina viva historia cun cavaliers e castellans.

Südostschweiz
06.12.13 - 01:00 Uhr

La Fundaziun ruina da Frundsberg retscheiva appartament a Montreux

Ina da quellas sesanfla sil crest da Plontabuora a Ruschein. Dapi ils 2004 s’engascha ina fundaziun pil manteniment dil monument historic. La pli davosa radunonza communala da Ruschein ha surdau a quella in schenghetg generus: La Fundaziun ruina da Frundsberg daventa proprietaria d’ina habitaziun a Montreux. Sigl 1. da schaner 2014 entra la nova vischnaunca Ilanz/Glion en funcziun. La facultad da 13 vischnauncas vegn incorporada el niev construct politic e confidada all’administraziun da lez. Quei ein cunzun ina massa immobiglias. La pli davosa radunonza communala dalla vischnaunca da Ruschein ha en quei connex fatg ina zavrada anticipada. Ils 19 da november ein ils da Ruschein s’entupai per la pli davosa gada en casa communala per prender conclus sco vischnaunca suverana. Igl ei buca stau ina radunonza specialmein festiva. Persuenter han ils da Ruschein priu ina decisiun commemorativa: Unanim ha la radunonza decidiu da surdar ina immobiglia alla Fundaziun ruina da Frundsberg. Buca la ruina sil crest da Plontabuora. Ei setracta d’ina habitaziun a Montreux ch’ei dapi 1993 en possess dalla vischnaunca politica da Ruschein. La habitaziun alla Riviera dil Lac Léman ei situada egl Eurotel, in dils dus sgrattaneblas da Montreux. Sco quei ch’il president dalla Fundaziun ruina da Frundsberg, Gion Mathias Cadruvi, confirma, setracta ei d’in appartament en quei baghetg marcant.

Signur Burkhardt da Ruschein

L’jamna proxima vegn ina delegaziun da Ruschein a viagiar al Lac Léman per suttascriver la midada da maun. Duas persunas dalla fundaziun e dus representants dalla vischnaunca politica vegnan a sigillar sil register funsil da Montreux la surdada digl object. Gion Mathias Cadruvi ei satisfatgs ch’igl ei gartegiau da salvar quella immobiglia sco fontauna d’entrada pils basegns exclusivs dil vitg da Ruschein. «Il recav annual da quei appartament a Montreux garantescha egl avegnir in sustegn cuntinuau dil project da Frundsberg», declara il president dalla fundaziun. El discuors cull’Agentura da novitads rumantscha confirma el che la vischnaunca da Ruschein seigi vegnida igl onn 1993 en possess da quei appartament. Igl ei in schabetg sco quei ch’ina vischnaunca muntagnarda giavischass meinsvart. In signur Georg Burkhardt, domiciliaus a Worms en Tiaratudestga, denton burgheis svizzer da Ruschein, ha testamentau a sia vischnaunca burgheisa quei appartement ch’el possedeva a Montreux.

Igl ei aschidagir ina donaziun dil «Gieri de Frundsberg» ch’era emigraus. Ella monografia «Ruschein – fatgs ord l’historia» san ins leger il suandont: «Burkhardt ei burgheis da Ruschein dapi 1811. Oz vivan ca. 200 Burkhardts da Ruschein, mo negins ein sesents en vischnaunca», scriva scolast Luzi Cadruvi en sia cronica ch’el ha giu ediu ils 1984. Ils davos representants dalla famiglia Burkhardt ch’eran burgheis da Ruschein vivevan tochen viaden els onns sissonta egl uclaun da Salums sin territori da Laax. Las autoritads da Ruschein han giu negin contact ni cul «Gieri de Frundsberg» ni cun parents da lez. La vischnaunca ha retschiert la habitaziun sco legat e dapi 1993 profitescha ella d’in recav annual denter 5000 e 6000 francs. Tenor il conclus dalla radunonza communala dils 19 da november vegnan las entradas ord l’immobiglia en Svizra franzosa vinavon a star a disposiziun exclusiv al vitg respectiv alla fracziun da Ruschein. Quei ei stau la finamira dalla transacziun che vegn exequida l’jamna proxima sil cudisch funsil a Montreux.

Fundaziun ha saviu dar impuls

Dapi 2004 s’engascha la Fundaziun ruina Frundsberg pil manteniment dallas restonzas dil vegl casti dils signurs da Frauenberg/Frundsberg. Quels feudals dil 12- e 13avel tschentaner han giu ina certa rolla, cunzun ella colonisaziun dil territori dil Rein. Tenor ils historiografs han ils signurs da Frundsberg baghegiau igl onn 1285 il casti Gutenberg da Balzers. Era la ruina da Freudenberg a Bogn Ragaz ha in connex historic cun Ruschein tras las famiglias feudalas Toggenburg e Wildenberg.

Ensemen culla vischnaunca da Ruschein e culla Tgira da monuments dil cantun Grischun s’engascha la Fundaziun ruina Frundsberg dapi 2004 pil manteniment da quei scazi cultural e historic. A Ruschein dat ei negina uniun da traffic. Aschia ha la fundaziun saviu dar zacons impuls a favur dil turissem migeivel. Ella ha organisau ina sanaziun dils mirs ch’ei stada urgenta per motivs da segirtad. Silla morena prehistorica da Plontabuora organisescha ella mintga onn denter Nadal e Daniev ina sentupada idillica. Naven dalla baselgia da Ruschein san indigens e hosps serender sin in trutg ch’ei fullaus aposta per quei eveniment. Uonn ha quella sentupada liug ils 28 da december e per la dieschavla gada. Cun quei eveniment vegn la fundaziun aschidagir ad inaugurar in project pign enteifer il project cumplessiv da sanaziun: Cun sustegn da Felix Nöthiger, specialist da fortezias e castials, eis ei gartegiau da reconstruir il portal d’entrada dil casti da Frundsberg. Grazia all’ierta ed il sustegn da «Gieri da Frundsberg» vegn la fundaziun da Ruschein a saver conservar, mantener e tener liber era els proxims onns il crest da Plontabuora.

Kommentieren
Wir bitten um euer Verständnis, dass der Zugang zu den Kommentaren unseren Abonnenten vorbehalten ist. Registriere dich und erhalte Zugriff auf mehr Artikel oder erhalte unlimitierter Zugang zu allen Inhalten, indem du dich für eines unserer digitalen Abos entscheidest.
Mehr zu MEHR