Gallarias e punts en schliet stan

Ils proxims treis onns sanescha il cantun ina part dil stradun denter Mustér e Curaglia

Da Hans Huonder / anr

Las lavurs vegnan exequidas ils proxims treis onns. La Via Lucmagn atras las Ruinas ei vegnida construida ils onns 1950. Ella ei stada ina premissa per in bien andament dallas lavurs da baghegiar dallas Ovras electricas Reinanteriur SA. Il medem mument ha il stradun denton era purtau niev confort da traffic als vischins da Medel, mo era als viagiaturs sur il Pass dil Lucmagn. El decuors da quels rodund 60 onns ha la via denton pitiu, aschia ch’ina sanaziun totala d’ina gronda part dil trassé, dallas gallarias, dallas punts e dils tunnels ei necessaria per garantir la funcziun dalla colligiaziun egl avegnir. Igl Uffeci da construcziun bassa dil cantun Grischun ha laschau elavurar in project persuenter che preveda la sanaziun dil tschancun denter la punt da Fontanivas e la gallaria dalla Val Ruinas dadens la sbuccada el tunnel da Mompé Medel. Tschei tschancun – da leu entochen alla punt sur il Rein da Medel – ei en projectaziun. Sco quei che Peter Stirnimann digl uffeci da construcziun bassa di, vegn il traffic buca restrenschius da num il temps da sanaziun. Els loghens pertuccai sto el denton vegnir menaus sin in sulet vial. Il tschancun che vegn sanaus ils proxims treis onns ha ina lunghezia da 900 meters.