Fier e tola, materials fascinants

(anr/rd) Chi chi aintra a Samedan illa fuschina dal farrer d‘art Curdin Niggli aintra in ün muond a la veglia. Davo plüs sogiuorns illa Svizra bassa ed a l’ester, ingio ch’el ha pudü, in differentas fuschinas, profitar ed imprender bler, es el tuornà avant 25 ons in Engiadina. «Eu n’ha installà alch maschinas chi’m güdan a scurznir il temp da lavur, però tuot quai chi’d es pussibel fetsch eu amo a la moda veglia, nempe a man», intuna’l. Impustüt las lavuors creativas til plaschan. Sia professiun spordscha bleras pussibiltats da’s sviluppar ed el predscha da pudair elavurar fier e tola fond ogets, sculpturas e bes-chas.