Festa d'inauguraziun illa «Villa Milla»

Avertüra da canorta i'l cumün da Scuol

I'l anteriur edifizi da l'impraisa Energia Engiadina ha la società Chüra d'uffants Engiadina Bassa inaugurà in venderdi la Canorta «Villa Milla». Quai es la prüma da seis gener illa regiun. Ella es gnüda realisada cun sustegn da la Pro Engiadina Bassa (PEB). La gestiun sco tala vaiva fingià cumanzà la mità d'avuost. Avant e davo la part ufficiala han bleras persunas profità da l'occasiun da tour suot ögl l'interiur renovà chi'd es gnü adattà als bsögns dals uffants. A la festa d'inauguraziun han ils uffants pudü far gös ed ultra da quai haja dat ün aperitiv per grond e pitschen e musica.

«Canorta augmainta attractività da la val»

Pro l'avertüra han tgnü pled Maja Bischoff-Pool, la presidenta da la società Chüra d'uffants Engiadina Bassa, Guido Parolini, il president da la PEB e Sabine Hasler, respunsabla pel ressort famiglia, uffants e giuvenils i'l uffizi social dal chantun Grischun. Ella ha ingrazchà in seis discuors tanter oter a Maja Bischoff-Pool chi presidiescha la società Chüra d'uffants Engiadina Bassa. Ella ha inclus la PEB, al cumün da Scuol, a la suprastanza da la società Chüra d'uffants Engiadina Bassa ed otras instituziuns per lur ingaschamaint per la canorta a Scuol. «In Grischun daiva dal 2003 ses canortas ed ingon existan 17 in tuot il chantun. Quai es ün grond svilup infra cuort temp», constata ella, «quel correspuonda al bsögn da bleras famiglias. Firmas, uffizis e parlamaints vezzan la necessità da talas sportas.» Parolini ha manzunà ün ulteriur aspet in seis pled: «Ill'Engiadina Bassa daja bleras plazzas da lavur ed üna vasta sporta turistica. Famiglias dal di existan fingià daspö ün pêr ons. La 'Villa Milla' contribuischa ad ün ulteriur augmaint d'attractività da nossa Val.» Maja Bischoff-Pool ha explichà in seis discuors ün oter böt da la canorta: «Nus vulessan promouver il rumantsch pro'ls uffants ed in general lur independenza e creatività.»

Co es la «Villa Milla» organisada?

«Illa canorta da Scuol lavuran üna manadra, sia substituta e trais agüdontas. Quellas as pon occupar da desch uffants a la jada, respectivmaing per gruppa», disch Maja Bischoff-Pool, «dal punct da vista organisatoric funcziuna nossa instituziun sco otras canortas. Nus vulessan cha'ls uffants vegnan in contact culla natüra i'l parc dal Bogn Engiadina Scuol in stretta vicinanza. Perquai eschna cuntaintas cul nouv lö central ed eir sper la plazza da giovar dals bogns.» Ella declera chi detta pigliond our la canorta eir otras pussibiltats da chürar uffants : «Daspö il 2001 ans stan a disposiziun mammas dal di.» Chi detta eir famiglias grondas chi han il permiss dal chantun da chürar ün pitschen numer d'uffants dürant trais dis l'eivna per desch uras al di. Cha quistas famiglias grondas possan tour sü fin ses uffants. Ch'actualmaing daja da quellas a Zernez ed Ardez siond cha l'Engiadina Bassa saja gronda cun blers cumüns e cha tocca pro eir Samignun. «Sco terza varianta daja in nossa regiun uossa eir amo la canorta», disch ella.

Cun sustegn dal chantun e per part eir cun confederaziun

Sco cha Maja Bischoff-Pool explicha vegnan las mammas dal di pajadas cun üna contribuziun da basa tenor ils reglamaints dal chantun. «Las differentas sportas correspuondan al bsögn da mammas da famiglia cun pitschen gudogn, da quellas chi educheschan sulet lur uffants u da quellas chi vöglian restar activas in lur manster», nomna ella sco motivs per fundar üna canorta in Engiadina Bassa. Tenor las ledschas dal chantun vegnan ils cuosts da gestiun dad üna canorta scumpartits tanter il chantun, ils cumüns partecipats ed ils genituors chi surdan lur uffants vi pel di a la chüra ad üna canorta. La gronda part, var 60 pertschient pajan las famiglias svess e quai sün basa da la taxaziun da lur impostas. La confederaziun as partecipescha be a la finanziaziun da las canortas i'ls prüms ons da gestiun. La «Villa Milla» es averta da mardi fin venderdi da las 07.00 fin las 18.00 per uffants da trais mais fin pro l'età da scoula.