×

«Fer invezza da spetter e reclamer»

15 mussedras, magistras e magisters da l’Engiadin’Ota as fatschendan pel mumaint cun exerciter, arrandscher, suner e chanter. Els, ils «Rambazonis» realiseschan il disc cumpact dobel «Ramba Zamba».

Südostschweiz
Mittwoch, 06. April 2011, 02:00 Uhr

Ils Rambazonis edischan ün disc cumpact cun 40 chanzuns puteras

Da Martina Fontana / anr

Quel cumpiglia var 40 chanzuns puteras per iffaunts. Avaunt circa ün an ho Daniel Manzoni da Segl edieu il cudesch da chanzuns rumauntschas per iffaunts «Ramba Zamba». El, l’unic musseder rumauntsch, es eir l’iniziant dal disc cumpact dobel chi ho il listess nom scu sieu cudesch. Il böt da quel disc es da motiver ad iffaunts e genituors da chanter – e da promouver cun que l’idiom puter.

Grand interess davart da mussedras e magistraglia

«Zieva cha d’he edieu mieu cudesch cun chanzuns rumauntschas haun bgers dumando scha nu’s pudess eir udir las chanzuns», declera Daniel Manzoni. Ch’in seguit hegia’l contacto a mussedras ed a la magistraglia da las scoulas primaras da l’Engiadin’Ota per gnir a savair sch’el survgniss sustegn. «Sulet nu sun eau uschè bun da pudair edir svess ün disc cumpact», agiundscha’l in riand. L’eco cha Manzoni ho survgnieu es sto immens: 15 mussedras e magisters e magistras da scoulas primaras d’Engiadin’Ota haun spontanamaing dit chi vöglian as parteciper al proget «disc cumpact cun chanzuns puteras per iffaunts».

In schner dal 2011 s’haun inscuntros ils «Rambazonis»: Sibylle Häberli, Schlarigna, Sidonia Janett-Melcher, Samedan, Duri Janett, Samedan, Annigna Nogler, Bever, Chasper Valentin, Puntraschigna, Patrik Würms, Puntraschigna, Martina Crameri, Samedan, Urs Camozzi, Schlarigna, Fabia Zöllig, Puntraschigna, Claudia Bezzola, Zernez, Sara Nicca, Schlarigna, Chatrina Murtas, Schlarigna, Simone Pedrun, Samedan, Madlaina Ganzoni, Zuoz, Leticia Demonti, Zuoz e Sabina Gustin, Bever per la prüma vouta. «Nus avains in quell’occasiun decis che chanzuns cha vulains preschanter ed avains furmo quatter gruppas», declera il musseder. Mincha gruppa ho in seguit exercito tschertas chanzuns per las preschanter in seguit al rest dals «Rambazonis». «Trais gruppas haun intaunt già registro las chanzuns chi gnaron lura eir preschantedas sül disc cumpact dobel Ramba Zamba», disch Manzoni. L’ultima gruppa faro que prosmamaing.

Promouver svess il umauntsch e na spetter

Il disc cumpact dobel «Ramba Zamba» ho il suottitel «tadler – incler – chanter». «In legiand il cudesch Ramba Zamba, inua cha las chanzuns sun declaredas ed illustredas, ed in tadland il disc cumpact as paun ils iffaunts s’imaginer pü bain que chi faun», declera Daniel Manzoni. Cha quella cumbinaziun saja ultra da que ün bun sustegn per genituors u otras persunas chi vöglian chanter culs iffaunts las chanzuns. «Scha genituors u otras persunas faun que es que a listess mumaint ün grand sustegn per me scu musseder, per otras mussedras e per magistras e magisters», disch el. Cha’l puter gnia promovieu in quel sen in möd speciel. «In Engiadin’Ota fo que dabsögn da tuotta sorts mezs per promouver nos idiom e perque as stu eir fer qualchosa», disch el. Da spetter fin ch’otras persunas fatschan que, saja fos: «Da ster cò e be reclamer nun es la güsta via», managia’l, «nus stuvains musser interess e piglier svess per mauns tschertas chosas.»

In settember gnaro «Ramba Zamba» preschanto al public

Scu cha Daniel Manzoni declera es il disc cumpact dobel «Ramba Zamba» già bod glivro. «Nus il vulains però preschanter pür in settember», declera’l. Cha da fer que aunz la finischiun da quist an da scoula nu saja pussibel. «Zieva l’inizi dal nouv an da scoula preschantains lura gugent il disc cumpact dobel.» Uschè paun iffaunts, genituors e magistraglia s’allegrer in settember da pudair cumprer il disc cumpact chi varo üna prüma ediziun da 1000 töchs. Termin e lö da preschantaziun gnaron dos cuntschaint a temp ütil.

Kommentar schreiben

Kommentar senden