×

24 uras per construir in roboter

(anr/sr) Questa fin da jamna ha la concurrenza naziunala da robotica liug ella Scola cantunala grischuna a Cuera. La concurrenza per scolars dalla scola media – che cuoza 24 uras – vegn organisada dall’uniun Helveticrobot.

Südostschweiz
Mittwoch, 16. Januar 2013, 01:00 Uhr

La finamira da quella ei da motivar giuvenils en Svizra per la robotica. Ils 19 e 20 da schaner 2013 semesiran rodund 30 teams dall’entira Svizra e construeschan roboters. Duront dus dis survegnan ils participonts ella vegliadetgna da 13 tochen 20 onns la pusseivladad da far in’entschatta plascheivla el mund dalla tecnica. En exact 24 uras san ils participonts sviluppar, construir e programmar sezs in roboter. Sco ils organisaturs scrivan en in communicau da pressa va ei tier quella concurrenza en emprema lingia per saver far experientschas sil sectur dalla robotica. Ils megliers teams survegnan premis.

La Scola politecnica federala (SPF) Turitg metta a disposiziun a Helveticrobot ils sortiments da construcziun necessaris per saver realisar la concurrenza. Quels «Kits da Lego NXT» vegnan era duvrai per la scolaziun da futurs inschigniers alla SPF Turitg. L’uniun Helveticrobot vul etablir ellas scolas medias svizras la robotica sco camp da perscrutaziun. A media vesta dueien ulteriurs teams puder vegnir motivai da separticipar als campiunadis mundials da robotica. Dil davos campiunadi mundial han sulet duas gruppas svizras priu part. Cun quellas mesiras vul Helveticrobot far enzatgei encunter l’actuala munconza d’inschigniers en Svizra.

Aspectaturs ein beinvegni en l‘aula dalla Scola cantunala grischun, Arosastrasse 2, Cuera. A partir da sonda allas 11.00 tochen dumengia allas 14.00.

Kommentar schreiben

Kommentar senden