Für daas hät mä gueti Nachpuure

von Dodo Brunner *

Hüt wett ich Ine gäre e Gschicht verzelle, wo sicher Ires Härz wird berüere und Si gliichziitig ä zum Schmunzle und zum Naachetängge bringt.

Woni ame chalte, früene Winteraabed zimmli durfrore heichuu bi, hät mi d Chelti draa gmaanet¹, as es etz gad dr richtig Ziitphunggt sig zum dr Tüüfchüeler abtaue. Nu wänig Tääg vorhär isch daas nämmli ds Theema gsii vume Huusfrauegsprääch: Etz, wos chalt sig, sigs dr richtig Momänt für daas, wil mä en Underbruch vu dr Chüelchetti chäm umguu, wämä de gfrorne Läbesmittel wäred em Abtaue vum Grät veruse stelli. Und dä hät jedi vu dene Fraue zum Beschte ggii, we sii ds Iis im Gfrüürer verschwinde laat. Zwii händ gseit, am schnellschte gengs, wämä ds Grät vum Strom näm und dä mitem Füü drhinder geng. De warm Luft machi em Iis Bei und es sig im Schwigg² alles abtaut. Ich ha bis zueche immer es Beggi heisses Wasser i Tüüfchüeler ine gstellt. Das hät echlä Geduld pruucht, aber ich ha underdesse amel chänne öppis anders tue und zwüscheddure ds Wasser im Beggi wider wächsle. Daasmal aber hani dr Tipp vu mine Fründinne z Härze gnuu und bi mitem Füü aagruggt. Aber esoo schnäll, wesi versproche händ, isch es dä glich nüd ggange. Ich bi abeggruupet³ und ha mit dr warme Luft vum Füü probiert, ds Iis zum Schmelze z bringe. Wil de Posiziuu cheibe uuring⁴ gsii isch, bini vorem offne Chüelschrangg ufe Bode ghogget und ha sicher zäche Minute wiiter gfüünet. Viil studiere hani nüd möse bi dem Ärbetli und ich bi fascht echlä i ds Meditiere ine chuu. Drum bini gad raass erchlüpft, wos plötzli a dr Wonigstüür glüütet hät. Wili nümme zwänzgi bi, bini halt nüd so hantli vum Bode uufchuu und schu gchöri, we d Tüür uufgaat und öpper ganz vergelschteret⁵ rüeft: «Ich chume!» Wo mini Nachpüüri, wo e Schlüssel hät zu miner Wonig, mich gsiit uufhaape⁶, isch si ganz paff⁷ gsii, aber es ischere e Stei vum Härz troolet⁸. Und iich ha so wänig begriffe we Sii etz…

De besorgt Nachpüüri, wo plötzli daa gstande isch, hät es Telifon überchuu vu Nachpuure im Blogg wisäwii. Die sind trotz dr Chelti uffe Balkon use gu rauche und händ dur mis Chuchifänschter offebar öppis so Beuurueigends gsii, as si mini Nachpüüri vu z oberscht alarmiert händ. Es Rollo, wo für sii d Sicht i mini Chuchi nu obe ufe offe Chüelschrangg und unde uf mini Füess frii ggi hät und ds Liecht, wo i dr Chuchi prännt hät, händ si glaube luu, as ich regigslos vorem offne Chüelschrangg am Bode liggi! Mit dener Mäldig händs dä ebe mini rettend Nachpüüri uufgschreggt.

Ich ha dä aber chänne zum Fänschter use Etwarnig gii und mich bi dene uufmerggsame Nachpuure bedangge. Iri Reaggziuu hät mer aber glich gad echlä z tängge ggii: Si händ sich zwar gfreut drüber, as bi mir alls i Ornig und mir nüüt passiert sig, aber gliichziitig händ si sich entschuldiget, as si mich beobachtet heiged.

Etz mos mä sich doch emal vorstelle, as e Zigarettelengi öppe füüf Minuute gaat. Da hogget mä mitem Schlotteri i de Glängg uffem Balkon und gsiit, as wisäwii wäret de ganze füüf Minuute inere Chuchi dr Chüelschrangg offe isch und dure undere Teil im Fänschter gsiit mä zwei uubeweglichi Bei und zwii Füess. Und wämä dä nuch weiss, as de Bei und Füess anere nümme ganz taufrische Phersuu gchöred, wo älei läbt, dä faat mä doch dä schu aa studiere, oder nüüd?

Ich bi eifach nu danggbar, as ich Lüüt um mich umme ha, wo si druuf achted, wän öppis nüd esoo isch, wes sött sii, und dä au reagiered. Das git mir e guets Gfüül vu Sicherheit. Ich luege das für gläbti Nachberschaft und i keiner Art und Wiis as Gwunder⁹ aa.

* Dodo Brunner isch Mitgliid vu dr Academia Glaronensis.

Glossar

1 maane = an etwas erinnern
2 im Schwigg = im Nu
3 abegruupe = niederkauern
4 uuring = unbequem
5 vergelschteret = aufgeregt, bestürzt, erschreckt verwirrt
6 uufhaape = aus dem Kriechen aufstehen
7 paff = verblüfft, erstaunt
8 troole = rollen, fallen, stürzen
9 Gwunder = Neugierde