Soozäge e Folterchamer!?

von Käthy Rhyner-Freitag

Es mos im Faal niemed Angscht haa um mich – ich wirde vu niemedem gfolteret; daas machi schu selber!

Aber zu demm Thema mosi echlei uushole: Für mine Hans – em Schang – isch Sport immer wichtig gsii, und er hett gad ettli Sportaarte uusgüebt. Und wil eer dr maijöörische Überzüügig gsii isch, mä mös au i dä eigene vier Wänd luege, asme nüd iiroschti, frii nachem Grundsatz: wer raschtet, der roschtet, hetter immer wider ette e chliiners oder gröössers Gräät für d Fitness aagschaffet. Abgsii vu demm, as mä eimal mii, eimal weniger hett möse dr Geldseggel uuftue, hett mä für de Aaschaffige ä immer wider möse es Plätzli gfinde!

E bevoorzugte Platz isch vorem Telewischen gsii, da hetts ette ettis ggii z luege, wo hätt chänne ablängge vu dene Plaageriie uffem einte oder andere Foltergräät!! Ich chunech säge, ich ha nüd immer gjublet, wänn wider e sone Errungeschaft d Stube verstellt hett! Aber alls chume nüd haa, und mä werweisset, was eim echt mii chännt beglügge: e duretränierte Maa oder e uufgruumti Stube?

Sigs wes well – uff jede Fall hett das Ganz vor ettliche Munet au uff mich abgfärbt!

Ich ha do bschlosse, de Fitnessgräät z zügle, und drumm stünd hütt bi mir im Büro nebscht eme Schriibtisch mit Pheecee, Läptopp und Trugger au ettlichi Gschtell volle Büecher, und etz ebe ä nuch e Homträner, e Schtepper und es Ruedergräät.

Daas wäär etz ebe mini sogenannt Folterchamer. Und wil iich weder raschte nuch roschte will – au gedanggli – chänd all de Gräät regelmäässig zum Iisatz. Das wäär doch en eebigi Scheedi, wänn alls äso uugnutzt möst ummestuu.

Mängmaal chunntsmer bimiinemeid schu gad echlei as Folter vor, wäni wider ds Gfüül haa, ich mös etz das ganz Programm abeschpuele. Au ds Hirni wirt bi mir ette gfolteret, wäni ame Theggscht ummehirne, und daas chunnt nüd selte vor. Schliessli mome ettis aagattige mit dener vürige Ziit.

I letschter Ziit aber hett mä sich ja zwungenermaasse möse i dä eigene vier Wänd sportli oder au gsangli betäätige, und drbii isch halt ds Gruppeerlebnis schu echlei uff dr Streggi plibe. Au daas chu e Folter sii für d Lüüt!

Ich wiiche gröössere Mäntscheaasammlige immer nuch uus und hoffe, asi ämal ä jaa de blööd Masge nüd mos aalegge.

Zum Thema Masge gsiini gad es Bild vormer: Mitti Juli hett d Ziitig über d Maassnaame für de mornig Landsgmei prichtet, und sicher häder de Foti au gsii vu de Stimmbürger a dr Landsgmei – all mit Masge!! We heid si daas echt z stand praacht?... Fotimontaasch natüürli!

Da gsiht mä nu, as mä nüd nu alls Gschribis chu glaube – au mit de Bilder wirt mä nuch hinder ds Liecht gfüert! Wer chumer etz aber garantiere, as dr Ratsschriiber uff dr Titelsiite würggli e Glarnertüechli-Masge und es Fläschli Desinfekziu i de Händ ghäbet hett und nüd ette e Chalberwurscht und es Glas Burgwegler?!

Häder si schu poschtnet für more? Nüd d Chalberwurscht – d Masge meini!

Sicher häder dener dänggwürdige Landsgmei entgegägfieberet – aber hoffetli nüd über 38 Grad? Alls vergebis!

D Chalberwurscht chänder trotz dr Absaag esse und Masge bruucht mä allpott und gad wider – zum Biispiil gad etz au i miner Wanderwuche z Davos – eb i will oder nüüd.

Aber gfolget wirt!

Trotz allem: Häbed üüch Sorg und sind lieb zunänand!

Vum Schang sim Tiidi, em Käthy Rhyner-Friitig vu Niderurne