Verd-liberals vulan Jürg Kappeler en la regenza

Ils verds-liberals dal Grischun vulan in sez en la regenza e preschentan 10 candidats per il cussegl grond

Plinavant vulan ils verd-liberals preschentar en plirs circuls total radund 10 candidats per il cussegl grond. Gia avant 4 onns aveva la giuvna Partida verd-liberala preschentà la candidatura dubla da Josias Gasser e Jürg Kappeler anc ina giada per la regenza grischuna. Quai dentant senza success. Cun sias radund 4200 vuschs era Jürg Kappeler sa tschentà sin l’ultim plaz da 10 candidats.

Nominà danovamain Jürg Kappeler

Entant che Josias Gasser è daventa en il fratemp cusseglier naziunal candidescha Jürg Kappeler (55) ina ulteriura giada per la regenza grischuna. Stersas saira è el vegnì nominà da radund trais tozzels preschents sco candidats per quista scharscha. Dapi l’avust 2010 represchenta Kappeler il circul da Cuira en il cussegl grond e dapi il december 2011 è el commember dal parlament communal da Cuira. En questa funcziun è Jürg Kappeler era substitut da la cumissiun da gestiun e delegà en l’Associaziun grischuna per la dismessa dal rument Gevag. L’anteriur president dals verd-liberals dal Grischun è stà engaschà decisivamain tar la petiziun per ina plazza da Posta libra dad autos ed en il comité «Tempo 30 a Cuira». Jürg Kappeler è dentant era s’engaschà publicamain sco adherent da l’iniziativa per limitar las abitaziuns secundaras, da l’iniziativa «energia senza charvun» sco era sco adversari d’ina candidatura grischuna per l’olimpiada.

En il cussegl grond haja el gì success cun sia intervenziun per augmentar la limita da submissiun, per uschia priorisar las interpresas grischunas tar la surdada da lavurs publicas.

«Enconuschider profund da la politica chantunala»

Il parsura actual dals verd-liberals Christian Stricker ha ludà il candidat Jürg Kappeler sco «enconuschider profund da la politica chantunala». Sco proprietari d’ina atgna interpresa da cussegliaziun per implants d’infrastructura saja el in interprendider che saja disà da purtar sez las consequenzas da sias decisiuns. Sco motiv per sia candidatura ha Kappeler era menziunà che la regenza s’allontaneschia adina dapli dal pievel. Magrà che il pievel grischun haja refusà tant la candidatura per l’olimpiada, l’iniziativa per energia senza charvun etc. resguardia la regenza actuala anc adina betg quest signal dal temp.

Era cusseglier naziunal Josias Gasser ha dà en la medema crena, menziunond che ils elements verd e l’economia liberala na sajan anc betg represchentads commensuradamain en la regenza. Tenor Gasser èsi legraivel che la giuvna partida possia ir cun «in chau profilà» en l’arena electorala. Dal reminent chattia il program da partida dals verd-liberals tar il pievel dapli sustegn ch’ils concepts conservativs da pps e pbd.

Forza da fracziun en il cussegl grond

Sper las elecziuns da la regenza che lubeschian a la partida da sa posiziunar en il spectrum politic sajan cunzunt era las elecziuns dal cussegl grond da muntada centrala per la giuvna partida. Tenor il parsura Christian Stricker vulan ils verd-liberals cuntanscher almain forza da fracziun en il cussegl grond. Tut en tut vegnian radund 10 candidatas e candidats nominads en differents circuls, uschia a Cuira, Tavau, Tschintg Vitgs, Foppa, Poschiavo ed Aschera. «Ils verd-liberals vulan documentar ch’els fan ina politica cun «ideas raschunaivlas, autentica e lucca».