Torpedau ina midada urgenta

da Martin Cabalzar

Cun gronda maioritad ha il cussegl grond perquei era sancziunau ina soluziun che vul esser pli transparenta e gesta. Ella vul eliminar impuls falli che cementeschan il status quo ed impedeschan aschia svilup e progress. Era il cantun ei semussaus generus, mettend a disposiziun al fondo d’ulivaziun 21,7 milliuns.

Gia ella debatta parlamentara havevan exponents d’Engiadina Aulta smanatschau cul referendum, vulend metter sut squetsch il parlament. S’entelli ch’igl ei il dretg legitim e democratic da scadin burgheis da prender il referendum enviers decisiuns che paran ad el nungistificadas. El cass concret lavagan ils exponents dall’Engiadina Aulta denton sensiblamein lur «goodwil» egl ulteriur cantun. Quei tonpli che administraziun e regenza han descargau quella regiun per ina tiarza dallas grevezias previdas oriundamein. Sche l’Engiadina Aulta selamenta fa ella quei sin ault nivel. En Engiadina Aulta pagan ins aunc oz entochen la mesadad pli pauc taglia che en autras regiuns. Motiv da selamentar havessen biaronz vischnauncas concessiunaras d’ovras electricas che han contribuiu entochen uss in bienton dapli alla ulivaziun da finanzas ch’ils loghens turistics beinstonts.

Era sch’il referendum vegn la finala strusch d’impedir la revisiun planisada. El vegn denton a retardar e torpedar quella revisiun che porta la finala gronds avantatgs a tut las vischnauncas da nies cantun per silmeins in ulteriur onn. Da quei piteschan cunzun las vischnauncas che ston renunziar in ulteriur onn a 21,7 milliuns dil cantun. Che quella summa vegn a metter differents budgets communals culs peis ensi san ins tgunschamein s’imaginar.

mcabalzar@suedostschweiz.ch