Temps difficils pil sectur da baghegiar

2015 quentan ils impressaris dalla Surselva cun dameins lavur

Da Hans Huonder / anr

Tenor els drova era il sectur turistic – oravontut la hotellaria – novs impuls. L’Uniun dils impressaris dalla Surselva ei seradunada a Breil. Dus onns suenter che l’inizitiava dallas secundas habitaziuns ei vegnida acceptada dil suveran svizzer pren siu effect empremas conturas. Il president dall’uniun, Daniel Blumenthal da Vella, quenta cun dameins lavur igl onn 2015. Il volumen d’engaschament che croda muort l’iniziativa duei vegnir recumpensaus – silmeins parzialmein – cun sanaziuns da baghetgs vegls: «Sin quei sectur exista in grond potenzial.» Ina schanza vesa el denton era ella hotellaria: «Quella sto vegnir promovida. Damai che investiziuns sin quei sectur ein fetg difficilas sto ina finanziaziun traversala esser pusseivla. Quei vul dir menaschis structurai da hotellaria en cumbinaziun cun habitaziuns administradas.» Daniel Blumenthal constatescha plinavon ina antipatia enviers l’economia en general. Per biars seigien ils impressaris gronds profitaders che fadigien bia daners e sappien selubir tut. In ulteriur aspect engreviont fuormien las prescripziuns.