Temp intensiv pel nouv cumün

In dumengia han ils capos da Guarda fin Sent pudü s’allegrar cha’l suveran ha acceptà cun passa 80 pertschient da las vuschs la fusiun da cumüns al nouv cumün cul nom Scuol. L’anr ha discurrü cul president da la gruppa da fusiun, il capo da Tarasp Christian Fanzun, e cun Jon Domenic Parolini, il capo da Scuol, davart ils prossems pass. Sco ch’els han dit fuorman ils capos actuals da las ses fracziuns per intant la suprastanza transitoria dal nouv cumün. Quista suprastanza ha uossa l’incumbenza da preparar tuot quai chi douvra per cha’l cumün fusiunà possa entrar in vigur a Büman 2015. Sco prüm douvra il nouv cumün üna constituziun cumünala, quella es necessaria per pudair eleger d’utuon ils gremis politics dal nouv cumün. «Il prossem pass – dad amo divers – sarà lura la ledscha d’impostas dal cumün fusiunà», dischan ils duos capos Fanzun e Parolini.