Tema da l’immigraziun da massa

La Svizra ed il Grischun acceptan l’iniziativa da la Partida populara svizra

da Martin Cabalzar

Ina giada dapli èsi reussì a la Partida populara svizra (pps) da gudagnar persula ina votaziun cunter l’opposiziun serrada da l’economia e da las ulteriuras partidas. Bain è il resultat cun mo radund 19 000 differenza vuschs extremamain filà. 17 chantuns e 50,34 perschient dals votants han acceptà l’iniziativa, 49,66 han refusà ella. La participaziun ha muntà a buns 56,6 pertschient. Fitg stretga è er la decisiun en il chantun Grischun stada. Cun 50,6% han Grischunas e Grischuns ditg gea a l’iniziativa «Cunter l’immigraziun da massa» – ina differenza dad 837 vuschs.

Il conclus federal davart la finanziaziun da l’infrastructura da viafier n’è betg stada dispitaivla. El è vegnì sancziunà cun 62 pertschient. Sulet il chantun Sviz ha refusà il project.

En Svizra pajan las assicuranzas da malsaunas obligatoricas er en l’avegnir l’interrupziun da la gravidanza. L’iniziativa che vuleva declerar quests custs sco privats ha fatg naufragi tar pievel e chantuns. Sulet l’Appenzell Dadens ha ditg gea a l’iniziativa che vul privatisar ils custs d’aborts. 2 019 033 (69,8%) votants han refusà l’iniziativa, 873 603 (31,2%) votants han acceptà ella.

Cler na a l’iniziativa per scassar la taglia da culturs

Il suveran grischun vul che firmas ed interpresas pajan era vinavant taglia da baselgia. 73,6% dals votants han refusà l’iniziativa dal pievel «Main taglia per il mastergn» dals giuvens liberaldemocrats. Dals 66 204 votants ch’èn stads a l’urna han be 17 453 ditg gea a l’iniziativa che vuleva liberar firmas ed interpresas da la taglia da cultus, la taglia da baselgia ch’il chantun incassescha e reparta sin la baselgias chantunalas catolicas ed evangelic-refurmadas. La participaziun a la votaziun è stada tar 50%.