Stagiun mediocra per pendicularas

Entochen la fin da fevrer ei igl unviern buca semussaus da sia megliera vart

Da Hans Huonder / anr

Il mars han las pendicularas grischunas saviu augmentar il diember da hosps per 6,6 pertschien en cumparegliaziun cul medem temps digl onn avon. Ella media dils davos tschun onns ei medemamein sedau in plus da 4,9 pertschien. Semeglionts augments nodan era ils menaschis da transport e gastronomia dils territoris da skis. Sut il streh resta tonaton in minus da 2,1 pertschien enviers igl onn precedent. Buc autra ei la situaziun en Surselva. Il territori da skis dall’Arena Alva noda in minus da 3,1 pertschien ni da 28 000 hosps entochen la fin da mars. L’Arena da skis Andermatt-Sedrun ha profitau dil Hotel The Chedi. «Gest el territori da skis dad Andermatt havein nus giu dapli hosps», di il directur Silvio Schmid. En Surselva ein treis territoris aunc aviarts entochen Pastgas, numnadamein quel dall’Arena Alva, Mustér e Sedrun, dalla vart d’Ursera era Andermatt. Generalmein vegn denton buca quintau cun fetg bia frequenzas e quei malgrad che las cundiziuns da neiv ein per part aunc fetg bunas. «Ina ga dapli vegn l’aura ad esser decisiva. Nus sentin quei oravontut tier hosps che possedan cheu casas ni habitaziuns da vacanzas. Bugen retuornan els da Pastgas», di Ruedi Büchi dallas Pendicularas Mustér SA.