Sluccar la protecziun dil luf

Intervenziuns da cusseglier dils stans Stefan Engler e dall’Associaziun svizra per las muntognas

da Martin Cabalzar

Dapi ch’ins ha cattau al Calanda in entir rosch da lufs, ch’in luf ei vegnius sittaus giu a Tumein e ch’in luf ha scarpau ina nuorsa e treis tschuts a Maiavilla ei la debatta davart la preschientscha dil luf daventada zun emoziunala. Era sin plaun politic ein pliras intervenziuns pendentas.

Ferton che la preschientscha dil luf vegn savens romantisada ed idealisada dils habitonts ella Bassa, caschuna ella savens malengasis, temas e sperditas cunzun ellas regiuns muntagnardas. Tenor l’Associaziun svizra per las regiuns muntagnardas va ei la finala per la funcziun e posiziun dallas regiuns da muntogna. La populaziun muntagnarda considereschi numnadamein il territori alpin sco spazi vital ed economic e buc exnum sco reservat dalla natira, constatescha la SAB. Tenor Stefan Engler duei il concept da lufs perquei buca risguardar mo unilateralmein la protecziun, anzi era ils basegns dall’agricultura e dalla populaziun muntagnarda.