Seschar inspirar dils students

Students dalla Scola politecnica federala sefatschentan culla revitalisaziun al Crap S. Gion

Da Giusep Venzin / ANR

Quella revitalisaziun succeda el rom dalla revoluziun al cuolm lantschada avon quater onns. Ier han biebein 50 students dalla Scola politecnica federala (ETH) visitau il Crap S. Gion ed il professer ed architect indigen Gion A. Caminada da Vrin ha accumpignau els. El rom dalla lavur da diplom ston els planisar ina «halla al cuolm» el sidvest dil baghetg existent. Ils architects vegnents han priu investa dil cuolm e dallas localitads ed els han retschiert ton da Reto Gurtner sco da differents professers d’architectura novs impuls. Las lavurs dils students duein en emprema lingia far impressiun als professers che dattan la nota, ellas duein denton era inspirar Reto Gurtner tier ses plans per in «liug cun effect» al Crap S. Gion. In liug da muntada per diever d’unviern e da stad vul il schef dall’Arena Alva realisar en quei liug sin 2200 meters sur mar.

Ina discussiun da podi el rom dalla scuntrada ha tematisau l’architectura, il turissem e la politica. Reto Gurtner ha numnau ina ortgadad da vuler organisar el Grischun ils giugs olimpics 2022 e duvrar 800 milliuns per baghetgs provisoris. L’olimpiada seigi ina numera memia gronda pil cantun Grischun.