Sentupada culs paupers

«Tischlein deck dich», cunzun pils gis da fiasta

dad Augustin Beeli / ANR

Schambuns e tschugalatas e mellis auters products carmalan. In cuntrast leutier ei la stizun da «Tischlein deck dich». L’anr ha visitau quella da Castrisch. Leu van ils pli paupers a cumprar quei ch’ei danvonz.

Ina gada ad jamna, mintgamai il vendergis, regia in pulit cunfar avon la casa da scola da Castrisch. La glieud dil vitg ei plaunsiu s’endisada vid il menaschi da «Tischlein deck dich». Ina camiunetta arriva sil plaz denter baselgia e casa da scola. Ei vegn scargau rauba, cunzun vivonda, per la distribuziun a glieud basignusa dalla Surselva. Avon treis meins ha l’organisaziun anflau in niev dacasa ambulont. Ils consuments che fan diever dalla purschida habiteschan ella regiun. Il menaschi a Castrisch ei in dils sis ch’ei dat el Grischun. En Svizra meina «Tischlein deck dich» 88 tals loghens da «vendita». Ei setracta d’ina uniun ch’exista dapi 1999. Il plaid romontsch per «Tischlein deck dich» fuss la «Meisa magica». Cheu san ils basignus cun buorsas vitas retrer regularmein vivonda frestga da qualitad. Per in prezi simbolic dad in franc retscheivan els quei ch’els drovan per surviver. Mintga vendergis parta il menaschi da scola a Castrisch la casa culs pli basignus dalla Surselva.