Scuol sposta votumaziun davart Trü

Executiva voul evitar cas giuridic

DA FLURIN ANDRY / ANR

A la fin dal mais d’eira previs cha las votantas e’ls votants da Scuol decidan schi dess dar üna revisiun parziala da la zona da planisaziun locala sün Trü. Il cussagl cumünal proponiva da metter tuot l’areal, eir la surfatscha ingio chi’s rechatta uossa la scoulina, illa zona turistica. Il cumün da Scuol vaiva inoltrà quista revisiun a l’Uffizi chantunal pel svilup da territori. La resposta as vaiva spettà in settember, ella es entrada però pür in october. «Als 8 october ha cumanzà l’uschenomnada exposiziun da cooperaziun, dürant trenta dis vaivan votantas e votants temp dad inoltrar instanzas in chosa Trü», declera il capo da Scuol Jon Domenic Parolini, «l’ultim mumaint es entrada quella da Jürg Arquint chi pretendaiva da suottametter al suveran eir amo sia proposta da serrar Trü ed elavurar ütilisaziuns alternativas da l’areal Trü.» Il cussagl cumünal ha respus ad Arquint ch’el refüsa sia instanza ed ha publichà sia posiziun sülla tabla naira ed i’l internet. Jürg Arquint nun ha però retrat sia instanza. Per evitar cha quista dumonda stopcha gnir sclerida dal güdisch administrativ ha decis her il cussagl cumünal da Scuol unanimamaing da spostar la votumaziun davart Trü süls 21 december.