Scazi historic, cultural e linguistic

La claustra da Mustér posseda ina dallas pli impurtontas bibliotecas romontschas

Da Hans Huonder / anr

Tonaton dispona la claustra d’ina gronda ed interessanta biblioteca romontscha. Ella ei il meret d’entgins bibliotecaris fetg premurai. Fundatur dalla biblioteca romontscha sco quei ch’ella sepresenta oz en claustra ei pader Baseli Berther, oriunds dalla Val Tujetsch, staus. 1883 eis el entraus en claustra e ha ladinamein entschiet a sefatschentar dils cudischs e dalla cultura romontscha. Entginas paucas ovras ha el anflau ellas localitads dalla claustra, la gronda part ha el denton rimnau. El ha tarmess ils students ellas casadas romontschas e quels ein returnai cun beinenqual cudisch e manuscret. Autras ovras ha el brattau, per exempel cun la Biblioteca cantunala ni cun bibliotecas d’autras claustras. La biblioteca romontscha dalla claustra da Mustér dumbra oz rodund 10 000 toms da gasettas e periodicas, cudischs e manuscrets. Denter quels sesanflan era entginas ovras fetg veglias e raras, sco per exempel la «Anatomia dil sulaz» dad Adam Nauli, stampada 1618 a Lyon. La biblioteca conserva ovras da tuts idioms romontschs dil Grischun e dall’Italia. Leutier vegnan parts d’entgins relaschs da scribents romontschs. La biblioteca ch’ei da gronda muntada culturala e historica survescha denter auter al gimnasi dalla claustra da Mustér.