Respect vers las vischnancas da pionier

Acziun da manifest da la «Pro Rumantsch»

DA GION NUTEGN STGIER / ANR

Gia 235 persunas èn s’inscrit-tas sin la glista en l’internet: www.prorumantsch.ch. Suenter che dat gia en Engiadina, en Surselva ed en Val Müstair, cun las uniuns «Pro Idioms» bleras persunas ch`èn cunter il rumantsch grischun en scola, s’annuzian uss cun la «Pro Rumantsch» era ils aderents dal rumantsch grischun. Otg persunas da tut las regiuns da noss chantun vulan sustegnair il rumantsch grischun e cunzunt mussar ch’i dat blera glieud en la Rumantschia che guarda cun spiert aviert sin il rumantsch grischun en scola. Cun il manifest vulan las iniziantas ed ils iniziants cunzunt exprimer respect envers tut las vischnancas ch’han gia introducì il rumantsch grischun en scola. La gruppa da la «Pro Rumantsch» vul dentant era animar las autras vischnancas da far il medem, quai en emprima lingia per amur d’ina ferma Rumantschia ed an spezial era en favur da la proxima generaziun. Grazia al rumantsch grischun haja il rumantsch ils ultims 30 onns survegnì ina plivalur e grazia a la lingua unifitgada saja dentant era creschi il stgazi da pleds en ils idioms. La gruppa che ha l’entschà il manifest en l’internet ha accentuà che Rumantschas e Rumantschs duaian era vinavant discurrer en l’idiom cun tuts sias colurs, dentant cumenzar a scriver en scola ina lingua cuminaivla.