Oscar Peer purtader dal Premi grischun da litteratura 2014

Il Premi grischun da litteratura 2014 va al scriptur Oscar Peer, Cuira/Lavin. Oscar Peer survegn il premi en renconuschientscha ed auta stima per sia ritga ovra litterara, creada cun maestria en rumantsch e tudestg durant ina lunga operusitad nuninterrutta e cun ina gronda passiun per ils cudeschs ed il scriver.

Vers la fin da november 2013 ha il cussegl da fundaziun decis d’assegnar il Premi grischun da litteratura 2014 ad Oscar Peer. La presidenta ha infurmà immediat l’onurà en occasiun d’ina visita tar el a chasa. Oscar Peer è s’allegrà fitg davart la distincziun. Sin ses giavisch avain nus lura era dumandà Ulrich Schelling da far la laudatio ed avain definì il rom musical da la surdada dal premi.

L’annunzia da sia mort curt avant Nadal ha constristà fitg il cussegl da fundaziun. Nus avessan gugent surdà il premi ad Oscar Peer persunalmain e partì cun el il plaschair davart la distincziun. In confiert per nus è da savair che Oscar Peer ha pudì s’allegrar da quella davosa onurificaziun durant sias davosas emnas da la vita. La renconuschientscha cun il Premi grischun da litteratura per l’ovra d’ina entira vita è stada fitg impurtanta per Oscar Peer ed igl al displascheva da betg astgar parter il plaschair cun la publicitad fin tar la communicaziun uffiziala, la quala succeda adina il schaner.

Tenor cunvegna cun la dunna dad Oscar Peer ha lieu la surdada dal premi sco previs mez favrer. Monica Peer vegn a prender encunter il Premi grischun da litteratura 2014 en num da ses um.

La surdada publica dal premi 2014 è mesemna, ils 12da favrer a las 18.00 en Biblioteca chantunala Cuira. La laudatio tegn Ulrich Schelling, germanist, a Winterthur e per l’accumpagnament musical procuran Céline Müller-Diacon (violina) ed Adrian Müller (violoncello).