Nova entschatta amiez la Surselva
(anr/abc) Il gi da Daniev 2014 ei in historic pil marcau da Glion e per 12 vitgs dil contuorn. La vischnaunca Glion/Ilanz – ni cul num tudestg ordavon Ilanz/Glion – remplazza il construct politic Foppa che ha valiu duront bunamein 150 onns.
(anr/abc) Il gi da Daniev 2014 ei in historic pil marcau da Glion e per 12 vitgs dil contuorn. La vischnaunca Glion/Ilanz – ni cul num tudestg ordavon Ilanz/Glion – remplazza il construct politic Foppa che ha valiu duront bunamein 150 onns.
Apéro da Daniev a Ilanz/Glion
Dad Augustin Beeli / ANR
Agl apéro da Daniev sin Plazza Cumin ha il president communal Aurelio Casanova rendiu attent la populaziun da buca spitgar miraclas.
La nova constellaziun politica ella regiun dalla Surselva amiez ei ussa realisada. Cull’entschatta dil 2014 ei la vischnaunca da Ilanz/Glion entrada en vigur. Ella includa las 12 fracziuns Duin, Pitasch, Riein, Sevgein, Castrisch, Luven, Schnaus, Rueun, Pigniu, Siat, Ruschein, Ladir ed il marcau da Glion. Sill’anteriura Plazza Cumin a Glion ein rodund 350 persunas s’entupadas per far in viva sigl onn niev e sill’entschatta dalla vischnaunca nova. Quella dumbra rodund 4700 habitonts. Il territori communal s’extenda naven da nord culs péz Hausstock e Vorab e cunfin glarunes encunter sid cul Péz Radun e culla Lumnezia. Avon dus onns era la vischnaunca Safiental naschida, avon in onn quella dalla Lumnezia, ed ussa Ilanz/Glion sco pli gronda fusiun ch’ei vegnida realisada ella historia dil Grischun. Il president communal da Glion, Aurelio Casanova, ha tradiu en siu plaid ch’el hagi grond respect da quei uffeci. El ha era rendiu attent ils presents da buca spitgar miraclas cul niev construct politic. «Nus stuein acceptar terradas ed emprender ord lezzas. Nus vegnin era a far sbagls e trer nossas conclusiuns ordlunder. Nus stuein denton adina tener en egl nossa finamira communabla, e quei ei ina ferma vischnaunca cun in futur da success.»
Wir bitten um euer Verständnis, dass der Zugang zu den Kommentaren unseren Abonnenten vorbehalten ist. Registriere dich und erhalte Zugriff auf mehr Artikel oder erhalte unlimitierter Zugang zu allen Inhalten, indem du dich für eines unserer digitalen Abos entscheidest.
Bereits Abonnent? Dann schnell einloggen.