Lufs procuran puspè per tensiuns

Purs han tema per lur muntaneras

da flurin andry / anr

Uss ha communitgà l’Uffizi da chatscha e pestga chantunal ch’ins haja novas da la preschientscha d’in luf en Engiadina Bassa, en il spazi Ardez fin Susch. Quai fa quitads als purs da quella regiun. «Uss che nus laschain alura ora noss muvel sin il pastg e pli tard sin las alps», di Fadri Stricker, pur da Sent e president da la Società agricula Engiadina Bassa e Samignun, «co pudain nus proteger nossas muntaneras anc meglier e tgi surpiglia ils custs supplementars?» Jan Boner, tar il Plantahof l’incumbensà per la protecziun da las muntaneras, di che la meglra protecziun sajan anc adina ils chauns da protecziun e sco segunda las saivs electricas flexiblas: «Ils ultims trais onns che nus essan confruntads qua al Calanda cun plirs lufs avain nus gì detg bun success cun quellas metodas e mo paucs incaps cun lufs che han attatgà nursas.» Per ils custs supplementars per la protecziun da las muntaneras ed era per ils eventuals donns vegnan ils purs, sco che Boner infurmescha, indemnisads. Urs Wohler, il directur dal turissem regiunal, di che la cumparsa dal luf en Engiadina mussia che la natira saja qua anc intacta: «Nus na faschain però nagina reclama cun il luf, nus avain fidonza en las mesiras che chantun e confederaziun vegnan a trair.»