Legassy daventa miss Foppa 2014

Exposiziun da biestga districtuala dalla Foppa a Glion

152 armauls ein vegni presentai la sonda sil plaz-fiera a Glion. Tenor il cau dall’organisaziun, Urs Spescha da Surcuolm, ei la qualitad dils animals danovamein stada fetg buna. Per part ein animals d’excellenta qualitad vegni presentai. Els s’audan denter ils megliers da lur raz en Svizra. A Falera ei buca mo igl emprem premi dalla miss Foppa ius, mobein era quel dil cup da menaschi, numnadamein ad Adrian Arpagaus. Campiunessa dallas genetschas daventa Fiocchina da Gion Beeli da Sagogn, ferton che la Hanni da Mathias Caduff da Glion ei ida cun la plema ella categoria dallas pli bialas dalla razza brina originala. L’exposiziun districtuala a Glion ei vegnida visitada stediamein da purs ed amitgs dall’agricultura.