La demontascha dallas regiuns

da Martin Cabalzar

S’adattond als basegns carschents ei l’uniun vegnida transformada 10 onns pli tard ella Corporaziun da vischnauncas Surselva ed actualmein ella Regiun Surselva. La Regiun Surselva vegn dirigida oz d’ina suprastonza e d’in parlament eligi dil pievel. El decuors dils onns ha la Surselva buca mo prestau lavur da piunier sil sectur dalla politica regiunala e dalla planisaziun directiva, anzi era tier la dismessa da rumians, la scola da musica, la promoziun economica e la scolaziun. La cooperaziun interregiunala ei semigliurada essenzialmein e l’identitad regiunala s’infirmida successivamein. La Surselva ei stada en quei grau ina regiun da piunier e vegn considerada sco regiun da model schizun sin plaun federal.

Cun siu verdict ha il cussegl grond demussau pauc respect per las structuras carschidas organicamein e legitimadas democraticamein. Enstagl da surschar allas regiuns la libertad da decider en atgna cumpetenza tgei incumbensas ch’ellas vulan surprender e co ellas vulan s’organisar vegnan quellas ussa fixadas per decret cantunal. Quei agir ignorescha il svilup, las relaziuns ed ils basegns heterogens dallas regiuns e destruescha soluziuns efficientas e cumprovadas. Ignorau han ins era las posiziuns da 2/3 dallas vischnauncas, da varga la mesadad dallas corporaziuns regiunalas sco era pcd, pbd e pps ch’eran s’exprimidas per surschar l’organisaziun en cumptenza dallas regiuns. Per la politica regiunala en general e per la Regiun Surselva en special munta la decisiun in deplorabel pass anavos. Suenter la demontascha dils cumins suonda ussa la demontascha dallas regiuns. La centralisaziun cuntinua pass per pass.

mcabalzar@suedostschweiz.ch