Ina pulita sfida e termins cuorts

Il concept per la tgira dalla cuntrada e politica agrara 2014–2017 fa prescha

Dad augustin beeli / anr

L’jamna proxima sto il biro d’ecologia inoltrar al cantun il concept per applicar il niev sistem da contribuziuns da surfatscha. Sch’ils 600 purs sursilvans san fixar aunc uonn ils contracts ei aunc buca clar. La politica agrara 2014– 2017 accentuescha la tgira dalla cuntrada. En vesta allas novas contribuziuns ch’il pur retscheiva per surfatschas cultivadas e buca pli per diember d’animals ei ina gruppa directiva vidlunder d’elaborar il concept che duei valer pils purs dil cantun Grischun. En Surselva ha l’Uniun purila sursilvana surpriu il patrunadi enten coordinar e preparar il niev sistem. Tut fa empau prescha, mo semtgau ei da principi nuot. La politica agrara metta la cuntrada varionta el center e vul ch’ils purs cultiveschien buca mo surfatschas cul tractur e cun maschinas che vegnan adina pli grondas. La tendenza va ella direcziun cuntraria. Il pur duei tgirar muschnas, segar pastiras che surcreschan, mantener la structura da rovens, metter truffels e sorts raras da graun. Quest’jamna han ils participonts che han gidau a sviluppar il concept per la Surselva priu notizia dil rapport final.