Ina perdetga da temps passai

La restauraziun dalla ruina dil casti da Putnengia a Dieni vegn terminada

Da Hans Huonder / anr

La restauraziun ei vegnida lantschada igl onn 1999 dil Forum cultural Tujetsch. Dapi lu han exponents da quel buca mo impundiu biaras uras da lavur el project, mobein era procurau la finanziaziun. Rodund 200 000 francs ha quella restauraziun custau. «Las proxima jamnas terminein nus la sanaziun. Silsuenter ein mo aunc las lavurs dil contuorn da far», di Tarcisi Hendry dil Forum. Las lavurs ch’ein vegnidas fatgas questa stad ein vegnidas survigiladas da Felix Nöthiger da Pro Castellis. Quella organisaziun sefatschenta da restauraziuns da castials e segida era ella finanziaziun da quellas. Il casti da Putnengia ei vegnius erigius entuorn igl onn 1200. Ins suppona ch’el seigi staus habitaus duront rodund 350 onns, oravontut dallas famiglias da Putnengia. Sin fundament da differents indezis vegn supponiu ch’ei hagi dau in incendi el casti. Schebein quel eis staus il motiv ch’ils habitonts han bandunau il baghetg ei buca clar. Biars onns ei vegniu fatg diever dalla crappa dil casti per la construcziun d’auters mirs ella Val. Cheutras ei il baghetg ius pli e pli en decadenza. Putnengia era igl emprem casti sper il Rein. El surveva sco center administrativ cun in ministerial. La claustra da Mustér haveva la suveranitad territoriala.