Ils burgheis fan frunt alla regenza

Ils burgheis da Glion han transferiu lur facultad en ina societad

Dad Andreas Cadonau

Malgrad la disposiziun dalla regenza grischuna. Ils burgheis da Glion han mess en pei ina societad e transferiu lur facultad. La decisiun definitiva davart la legitimitad dall‘acziun burgheisa croda pli tard. La vischnaunca burgheisa da Glion e la regenza grischuna han dau pitg pètg ils gis vargai. Pil mument silmeins ei quella lutga decidida a favur dalla vischnaunca burgheisa. Grazia ad ina disposiziun superprovisorica cun effect da suspensiun dalla dertgira administrativa han ils burgheis da Glion pudiu salvar radunonza ils 30 da december. Els han eligiu ina suprastonza, mess en pei ina societad burgheisa e decidiu da transferir la facultad ella societad. Quella societad vegn tgamunada a partir digl onn niev dad Ueli Giger. El ha dau d’entellir, suenter la radunonza dalla vischnaunca burgheisa da Glion, che ils biebein 120 burgheisas e burgheis da Glion cun dretg da vuschar seigien buca promts da parter la facultad cun ils biebein 1500 burgheis dalla nova vischnaunca dad Ilanz/Glion. Tenor retschercas buca confirmadas posseda la vischnaunca burgheisa da Glion respectiv la nova societad burgheisa ina facultad dad otg milliuns francs. Avunda per processar e sch’ei sto esser, tenor indicaziuns dil niev president, entochen alla dertgira federala.