Il premi grischun da cultura 2014 va a Hannes e Petruschka Vogel da Maton

da BARBARA RIEDHAUSER-RIESCH / ANR

Sco dachasa e lieu da lavur han Petruschka e Hannes Vogel tschernì avant 10 onns la vischnanca da Maton sin la Muntogna da Schons. Là vivan els en la «Tgea la Tur» che mussa endadens ed ordadora fastizs da lur lavur. Per exempel il zitat sin la fatschada da la chasa «Skam! Schams! Shames!» or dal cudesch Finnegans Wake da Jaimes Joye, cumplettà cun «Shamms», ina furma veglia dal num da la val. Uschia sco qua a Maton è la finamira da Hannes e Petruschka Vogel per il solit quella, da mussar la muntada d’in lieu cun aspects da sia istorgia e cumbinar quels cun elements artistics. Qua sa cumpletteschan l’architecta e l’artist en moda optimala. A Maton èsi da chattar anc in’autra chasa cun in’inscripziun da Hannes e Petruschka Vogel, uschiglio n’han els realisà naginas ovras publicas en Val Schons. Per viver e lavurar als para il lieu dentant ideal. El unescha la natira alpina ch’els aman ed il ruaus ch’els dovran per sviluppar ideas, ed è tuttina datiers da las vias grondas che mainan or da la val. En il Grischun èn da vesair pliras ovras da Petruschka e Hannes Vogel, a Cuira tranter auter ina paraid vi da la Loestrasse ch’els han creà sco omagi ad Alberto Giacometti. Ils texts en la paraid da metal stgaffeschan in connex cun l’ultima via terrestra da l’artist da quella via si en il spital, ed a la proxima giada ch’el è passà engiu suenter sia mort.