«Esser genitur da stars es captivant»

Il bap da Dario, Gianluca ed Andrea Cologna tira ün bilantsch da l’on passantà. Quel d’eira bain ün zich special – illa vita da famiglia nun ha’l, tenor Remo Cologna, però müdà bler. La carriera da passlunghists ha cumanzà tant pro Dario sco eir pro seis frar plü giuven, Gianluca, fingià avant blers ons. Ils genituors dad els s’algordan amo bainischem a las prümas cuorsas cha’ls giuvens han fat. Cha Dario es uossa «Svizzer da l’on 2013», «Sportist da l’on» e cha Gianluca ha d’incuort guadagnà la prüma medaglia da podest illa coppa mundiala fa impreschiun eir a bap e mamma. Andrea, la figlia, ha eir ragiunt bler in sia vita. Eir sch’ella nun es sco cha bap disch «absolutamaing brich sportiva». «Nus eschan superbis da noss trais uffants ed avain plaschair da tils pudair accumpagnar amo hoz», disch Remo Cologna.