Engler e Candinas sco favurits

Elita Florin-Caluori ha demissiunà sco presidenta da la pcd grischuna

da martin Cabalzar

Sper Elita Florin-Caluori demissiuneschan era la vicepresidenta Barla Cahannes ed il schef da finanzas Thomas M. Bergamin.

Sco emprima dunna ha Elita Florin timunà cun grond engaschi la pcd ils ultims 4 onns. Sut ses presidi è la partida vegnida reorganisada cun novas statutas ed in nov reglament da finanzas. Plinavant han ins fundà la «Cuminanza da lavur economia e societad» e la «Gruppa 60+». Plinavant ha la pcd defendì cun success ses mandats en la regenza ed en il parlament federal. Tuttina n’èsi sut sia direcziun betg reussì d’augmentar il potenzial da vuschs, il cuntrari, ins ha schizunt stuì registrar ina ulteriura digren.

La raschun principala da sia demissiun saja ch’il post da presidenta da la pcd na saja betg uschè bain cumpatibel cun il post da presidenta dal cussegl grond ch’ella vegn a surpigliar tenor turnus quest atun. Per quest motiv è la presidenta vegnida substituida l’ultim temp transitoricamain dals vicepresidents Barla Cahannes ed Alessandro Della Vedova. Sia incumbensa è ussa d’ir a la tschertga d’ina nova presidenta u d’in nov president.

Sco favurits per il presidi vegnan numnads cunzunt ils dus parlamentaris federals, primarmain Stefan Engler e lu era Martin Candinas. Gia avant els han parlamentaris federals sco Theo Maissen, Luregn Mathias Cavelty e Toni Cantieni timunà cun success la partida. L’experienza mussa era ch’igl è pli prudent d’occupar il presidi cun politichers arrivads che cun novizs che han sezs memia grondas aspiraziuns. Forsa gist perquai e pervi da la gronda lavur na para il presidi da partida betg d’avair gronda calamita.