×

Duair da dar part ils tschains da fin qua

Per mitigiar il squitsch sin ils pretschs per abitaziuns prevezza il cussegl federal d’introducir tar midadas da locaturs il duair da dir als novs locataris quant auts ch’ils tschains eran fin qua.

Südostschweiz
21.01.14 - 01:00 Uhr

Posiziun da l’APC grischuna envers quest intent

DA FLURIN ANDRY / ANR

Quest duair han fin ussa set chantuns. Dacurt ha communitgà cusseglier federal Johann Schneider-Ammann che ses departament examineschia la pussaivladad dad introducir in nov duair per ils locaturs: Quel prevesa ch’ils novs locataris vegnian a savair quant tschains da locaziun ch’ils anteriurs locataris pajavan fin qua. Ultra da quai duessan ils locaturs era stuair giustifitgar eventuals augments dals tschains da locaziun. Quest oblig d’infurmaziun exista fin uss en set chantuns. Per introducir quel en tut la Svizra fissi necessari da midar il dretg da locaziun federal. Tge din ils respunsabels da l’Associaziun grischuna dals proprietaris da chasas (APC grischuna) da quest intent d’introducir il duair d’infurmaziun era per ils locaturs grischuns? «Il duair d’infurmaziun è a l’avis da l’APC in furmalissem betg necessari che cumplitgass anc il dretg da locaziun odiern, il qual ha gia ussa memia bleras prescripziuns inutilas», di Reto Nick, il secretari da l’APC grischuna, «las experientschas fatgas en auters chantuns mussan che quest duair n’ha nagin effect ni sin il squitsch da pretschs per abitaziuns ni sin ils cas d’abus.» Da quel avis era er la maioritad dal cussegl grond: Durant la sessiun da december 2012 ha refusà il parlament grischun cun 76:15 vuschs in’incumbensa da la ps che vuleva introducir quest duair d’infurmaziun. Nick menziuna er il studi da la firma Wüest & Partner da Turitg, «era quel vegn a la conclusiun ch’il duair d’infurmaziun n’haja nagin effect».

Kommentieren
Wir bitten um euer Verständnis, dass der Zugang zu den Kommentaren unseren Abonnenten vorbehalten ist. Registriere dich und erhalte Zugriff auf mehr Artikel oder erhalte unlimitierter Zugang zu allen Inhalten, indem du dich für eines unserer digitalen Abos entscheidest.
Mehr zu MEHR