Distincziun pil chor claustral

Da Hans Huonder / anr

Dapresent festivescha la claustra da Mustér il giubileum da 1400 onns. La fin dallas festivitads fa ina turnea dil chor claustral. Quella meina da Mustér dil Rein giuadora entochena a Cologna la primavera proxima. En differents loghens concertescha il chor che vegn dirigius da Clau Scherrer. El project ch’ei sut l’egida dil rectur Bruno Hensler presenta il chor l’ovra «Ut unum sint» da Lorenz Dangel. Cumpletada vegn quella d’ina ovra dad Ursin Defuns. La musica ei scretta per dus chors – chor claustral e chor DeCato – per in grond orchester da corda, per tschun instruments da stuors e duas solistas. Il Premi Lily Waeckerlin ei ina dallas pli aultas distincziuns per projects innovativs sil sectur dalla giuventetgna e dalla musica en Svizra.