Cun dir na sligian ins buc ils problems

Da Lucas Deplazes / ANR

Sil sectur dalla sanadad publica exista ina situaziun semeglionta.

Dapi l’introducziun digl obligatori igl onn 1996 ein ils cuosts – encunter las empermischuns dil cussegl federal – explodi. La premias s’augmentan onn per onn, bia pli ferm che la carischia ni il product naziunal brut. La famiglia dil stan miez pitescha il pli ferm.Tuttas mesiras da frenar ils cuosts han fatg naufragi. Il singul ha neginas letgas. El sto acceptar las premias dictadas! La concurreza funcziuna gie buc.

Ella situaziun dad oz mira mintga actur – cantuns, organisaziuns dils miedis, industria farmaceutica – pils agens interess. Quels vegnan defendi cun smanatschas sco libra schelta dil miedi e libertad d’eleger la cassa, ni schizun cun la refusa dalla medischina la pli nova.

L’iniziativa en discussiun ei la tiarza che vul monopolisar il sectur dalla sanadad. In signal che stuess dar da patertgar. El parlament ha l’iniziativa sin meisa cattau simpatia, era sur las scheinas seniastras/verdas ora. Las partidas burgheisas quieteschan cun motivs che perschuadan buca pli. Vegn il problem buca sligiaus sil plaun politic vegn il pievel puspei a prender enta maun las hottas.

Da deplorar fuss en mintga cass sch’il resutat fuss ina ga dapli in conclus rigurus dil pievel. In conclus che purtass novs conflicts. Per exempel ina reducziun massiva dallas prestaziuns medicalas ni schizun ina dismessa digl obligatori. Quei muntass ina deplorabla desolidarisaziun culs pli fleivels, gest leu nua che la solidaritad ei dumandada il pli fetg.

l.deplazes@bluewin.ch