×

Clamau luvrers e vegni ein carstgauns

Ils meinis davart la circulaziun libra da persunas secuntrasteschan diametralmein. Quellas differenzas ein semanifestadas ella campagna da votaziun e pér da dretg el resultat ordavart filau dalla votaziun.

Südostschweiz
10.02.14 - 01:00 Uhr

da Martin Cabalzar

Pils adherents dall’iniziativa ei la libra circulaziun da persunas la cuolpa dalla criminalitad, dils mieds da transport fullanai e dalla construcziun sparpigliada e disordinada, pils adversaris eis ella in garant per prosperitad e beinstonza.

Bein ein ils jasters beinvegni sco forzas da lavur qualificadas e sco luvrers indipensabels cunzun el turissem, en casas da vegls e spitals e sils plazzals da construcziun. Pli bia fastedis caschuna lur presenza sco carstgauns cun basegns humans che surcargan nossas infrastructuras da traffic, profitan da nossas acquisiziuns socialas, concuoran cun nossas pagas, occupan las habitaziuns, restrenschan nies spazi da viver e caschunan gronds cuosts d’integraziun. Ni sco Max Frisch ha formulau a moda pregnanta: «Clamau vein nus luvrers, vegni ein denton carstgauns».

La gronda part da quels problems sefa denton valer cun ni senza la libra circulaziun da persunas. Igl ei numnadamein in fatg che la mobilitad dils Svizzers ei carschida marcantamein, il spazi da habitar e las pretensiuns da confort medemamein. La sfida da migliurar la situaziun cun mesiras flanchegiontas e cun in agir prospectiv vegn a restar era suenter la votaziun dad ier.

Il resultat ei in clar signal d’alarm. Probabel han ton ils politichers sco las medias sutschazegiau la brisanza e l’emoziunalitad dil problem. Ton ei cert. Il verdict dil suveran ei d’acceptar, sch’el ei staus sabis ni buca vegn denton pér a semussar egl avegnir. Factum ei che la munconza da forzas da lavur vegn anzi aunc a crescher e che nossa relaziun cun la Cuminonza europeica vegn a sesferdar. Mesiras da retorsiun tier las autras cunvegnas bilateralas ein buc exclaussas.

mcabalzar@suedostschweiz.ch

Kommentieren
Wir bitten um euer Verständnis, dass der Zugang zu den Kommentaren unseren Abonnenten vorbehalten ist. Registriere dich und erhalte Zugriff auf mehr Artikel oder erhalte unlimitierter Zugang zu allen Inhalten, indem du dich für eines unserer digitalen Abos entscheidest.
Mehr zu MEHR