Aulta concentraziun d’aur en Val Medel

Aulta concentraziun d’aur en Val Medel

Ils resultats dallas retschercas fatgas igl onn vargau en Sursassiala ein empermettents

Da Hans Huonder / anr

Quels ein fetg empermettents. Sco quei ch’il delegau dil cussegl d’administraziun dalla SwissGold Exploration SA, Ernst Schönbächler, ha detg enviers l’Agentura da novitads rumantscha, vegnan sulettamein ils resultats dallas examinaziuns dil material dalla Val Medel publicai il mument, quei per motiv che la societad sto setener vid las directivas dalla buorsa. Dallas 86 emprovas dalla Val Medel cuntenevan 72 0,015 grams aur per tonna. Da quellas cuntenevan 48 in gram per tonna ni dapli e siat schizun diesch grams aur ni dapli per tonna. «Quei ei secapescha fetg buns resultats. Cun il prezi actual digl aur renda ei gia d’explotar material cun ina consistenza da 5 grams per tonna», constatescha Ernst Schönbächler. Quels resultats confirman las examinaziuns fatgas gia pli baul en Val Medel. La SwissGold Exploration SA vul cuntinuar cun sias retschercas en Sursassiala, sche zaco pusseivel gia la stad vegnenta. Persuenter drova ei ussa denton novas lubientschas. Sco quei ch’il president communal da Medel, Peter Binz, ha detg sin damonda dall’anr vegni la suprastonza communala a fixar quels dis igl urari da termins per la legislaziun e las lubientschas davart las exploraziuns ed eventualas explotaziuns d’aur.