×

Per in Archiv central Surselva

Ei duvrass novs stauschs pil svilup e progress, quei ch’ei vargau ei vargau. Documents vegls ein arcuns che conservan nossa schientscha. E cheu ein documents vegls mo ballast ch’ins sto fierer naven.

Südostschweiz
31.01.14 - 01:00 Uhr

dad augustin beeli / anr

A Plaun Grond, ella deponia regiunala, serimna tut quei che impedescha il svilup. La historia locala e regiunala surlaian ins ad idealists ch’ins taxescha sco premurai nostalgichers. «Daco investar pil vargau? Quei ha gie negin senn», vegn ei getg. Glieud che giudichescha aschia capescha buca ch’ei drova ina cunscienzia, in arcun historic, e ch’ins duess tgirar l’atgna identitad.

Alla regiun dalla Ligia Grischa maunca in «Archiv central Surselva». Ins constatescha numnadamein ina tendenza viers la historia. Aschia semetta biara glieud alla tscherca dallas ragischs. «Danunder vegn mia schlatteina, danunder miu num» cumbinesch’ins cun programs electronics da genealogia. Ch’ei dat adina dapli romans historics ei medemamein in indezi ch’ils carstgauns s’interesseschan pil vargau. Savens van els bia memia lunsch per anflar connexs. Els van egl internet, consulteschan Wikipedia, enstagl da consultar in archiv regiunal.

Per tschercar e deponer actas privatas fuss ei bien sch’ei dess in tal archiv central. Quel savess esser cumbinaus cul Museum Regiunal Surselva MRS che fa lavur exemplarica. Leu mauncan denton las localitads. Co duess il MRS metter a disposiziun localitads cu el ha gie adina da sbatter cullas finanzas? Il niev deposit alla Via da Schnaus ei concepius per mobilias, ferramenta ed objects e buca per conservar pupi sensibel. Ei fuss ideal sch’ei funcziunass, mo igl ei naiv da manegiar ch’ins sappi fundar in archiv cun sustegn dil maun public. Ei sto dar in archiv central sursilvan. Mo nua, a Mustér ni a Glion? Tgi che pren l’iniziativa per fundar in archiv central Surselva ha ina pulita sfida.

Kommentieren
Wir bitten um euer Verständnis, dass der Zugang zu den Kommentaren unseren Abonnenten vorbehalten ist. Registriere dich und erhalte Zugriff auf mehr Artikel oder erhalte unlimitierter Zugang zu allen Inhalten, indem du dich für eines unserer digitalen Abos entscheidest.
Mehr zu MEHR