Angela Merkel respecta il gea svizzer

Sa chapescha ch’ella veglia respectar la decisiun, ha precisà Merkel. Tenor ella stoppian ussa vegnir tschertgadas schliaziuns raschunaivlas che sa basian sin ils princips da l’Uniun europeica. Er il minister da l’exteriur da la Germania, Frank Walter Steinmeier, è s’inscuntrà cun il president da la confederaziun. El ha suttastritgà che la Svizra saja uss obligada da preschentar propostas per schliar la chaussa suenter ch’il pievel svizzer ha approvà l’iniziativa cunter l’immigraziun da massa. La decisiun saja ina difficultad che stoppia vegnir surmuntada, uschia Steinmeier. Burkhalter ha engrazià a ses collega d’uffizi tudestg per la discussiun averta. Avertadad saja impurtanta, ha ditg Burkhalter.