Alternativas èn tschertgadas

L’agricultultura sa fatschenta cun medischina alternativa

Dad Andreas Cadonau

Remplazzar l’antibiotica cumplettamain cun medischina alternativa resta in’illusiun. Meds alternativs sco la omeopatia pon dentant gidar a sbassar il diever d’antibiotica en la medischina d’animals. Da quel avis èn differents veterinaris ch’applitgeschan medischina alternativa. Il diever d’antibiotica sto vegnir sbassà tenor las finamiras da la strategia naziunala instradada da la confederaziun per mitigiar la resistenza vers antibiotica. Quella resistenza è problematica tant en la medischina umana sco tar ils animals. Gia oz sa fatschentan bleras puras e blers purs cun omeopatia che ha chattà blera acceptanza en l’agriculutra malgrà la sceptica da la scienza. Ils curs dad omeopatia purschids dal Plantahof dapi in decenni èn anc adina bain frequentads. En Surselva porscha il veterinari Erwin Vincenz dapi blers onns medischina alternativa sper la medischina tradiziunala. Tant tar ils animals da niz sco da chasa daventa la medischina alternativa in’opziun tar il tractament.