Affons ventireivels egl igniv dalla columba

Barbara Casanova da Sursaissa s’engascha dapi 30 onns en favur dils affons a Peru

Da Giusep Venzin / ANR

Ils affons pesavan 1400 grams. Oz ein las duas buobas ed il buob scolars diligents dalla scola dil scalem superiur. Ivonne e Kassandra han ina finamira. Ellas vulan far in emprendissadi mercantil ed exequir pli tard l’administraziun da Urpi Wasi, dalla casa d’affons da Tía Barbi. Ils treis affons ein treis da plirs mellis affons che han anflau tier Barbara Casanova in dacasa. Actualmein visetan 370 affons dil marcau ch’ei liug da partenza per la viseta dil Machu Picchu la casa marcanta sin in crest. Ils affons da treis meins tochen 13 onns ein il di egl Urpi Wasi che munta igl igniv dalla columba. La notg ein els a casa tier ils geniturs. Quels geniturs san s’annunziar il fevrer tier Barbara Casanova e gia in di avon il termin stattan els en retscha per gie buca munchentar la caschun. La dunna da Sursaissa e collaboraturas visetan allura las famiglias e decidan tgei affons ch’anflan suttetg ella casa ed ella scola. Per quels che han quei cletg eisi ton sco in da sis el lotto. Egl «igniv dalla columba» survegnan ils affons avunda da magliar, ina excellenta scolaziun ed ina instrucziun etica e sociala. Era ils geniturs ein integrai el process d’educaziun e la dunna da 60 onns viseta nunspitgadamein ils geniturs per mirar co ei vesa ora a casa. «Ei fa buca senn da mussar als affons disciplina ed etica sche quei succeda buc era a casa.» Las mummas ston era separticipar als cuors d’alfabetisaziun.

Ina casa plein legria

A caschun da miu viadi tras il Peru e la Bolivia hai jeu giu la caschun ni plitost il cletg d’emprender d’enconuscher Tía Barbi. Aschia vegn Barbara Casanova numnda dils affons. Onda Barbi ha mussau las stanzas culs affons pigns, ina annada suenter l’autra. Ils affons ein vescals e resplendan legria. «Jeu survegn mintga di la pagaglia», ha la dunna ch’ei dapi 30 onns a Cusco detg. Ils egls dils affons tarlischan vesend Tía Barbi. Els san ch’els ein mitschai cun siu agid dalla pupira e meinsvart era digl uffiern. Barbara Casanova ha fundau Urpi Wasi cun ina canorta d’affons, ina scoletta e la scola primara tochen la sisavla classa e finanziescha il project cun donaziuns d’amitgs en Svizra ed en Tiaratudestga. Menada tenor il sistem svizzer ei la scola ina dallas meglieras dil marcau ch’era il temps dils Incas il center dil mund.

«El decuors digl onn vargau ei semussau ch’igl avegnir resta incerts sch’ei gartegia buca da preparar ils affons cun carezia e premura, cun responsabladad e disciplina sin quei avegnir.» Quei scriva Barbara Casanova el rapport annual da Urpi Wasi. En Peru ed ellas autras tiaras dalla America dil sid regia corrupziun ed ils regents miran igl emprem per sesezs e ditg suenter pils auters. Ils paupers ein ils davos en retscha. Violenza, alcohol e machissem ein savens la consequenza ed ils affons ein quels che piteschan il pli fetg dalla desperaziun.

Stipendis pils megliers scolars

Ils megliers scolars digl Urpi Wasi survegnan stipendis e san ir vinavon a scola. Actualmein gaudan 19 giuvenils quei sustegn finanziaus dalla Fundaziun Pro Niño. Cul stipendi eisi denton buca fatg. Els ston frequentar la scola secundara denter ils megliers, autruisa eisi finiu cul sustegn. Ivonne, Kassandra e Victor Abel ein treis dils sclolars cun stipendi ed els ein denter ils megliers dalla classa. Avon 14 onns ha Barbara Casanova buca giu bia lètga vesend ils trimellins nievnaschi. Siu engaschi pils treis affons ei sepagaus sco era igl engaschi per mellis affons dil marcau cun gleiti 400 000 habitonts sin 3400 meters sur mar.

Förderverein B. Casanovas Urpi Wasi, Cusco-Peruc/o Elisabeth Jud, 6317 Oberwil b.Zug.

Zuercher Kantonalbank, 8010 Zuerich

CH44 0070 0350 0413 8611 8